Mae’r stori hon hefyd ar gael yn Saesneg – cliciwch yma i’w darllen.
Wrth i Galan Gaeaf a Noson Tân Gwyllt agosáu, mae Gwasanaeth Tân ac Achub De Cymru (GTADC) yn lansio ei ymgyrch flynyddol, sef Ymgyrch Bang, i fynd i’r afael â’r cynnydd mewn digwyddiadau’n gysylltiedig â thân ac ymddygiad gwrthgymdeithasol sy’n digwydd fel arfer rhwng 25ain Hydref a 11eg Tachwedd.
Er bod y cyfnod hwn yn cael ei ddathlu gan lawer, dyma un o’r cyfnodau mwyaf heriol o’r flwyddyn i griwiau tân. Mae GTADC yn gweld cynnydd sylweddol mewn tanau a gynnau sy’n cael eu gosod yn fwriadol, camddefnyddio tân gwyllt, ac ymosodiadau ar ymatebwyr brys –
“Mae ein diffoddwyr tân yma i amddiffyn a gwasanaethu dros 1.6 miliwn o bobl ledled De Cymru,” meddai Mike Hill, aelod o Dîm Lleihau Llosgi Bwriadol y Gwasanaeth. “Ond yn ystod Ymgyrch Bang, rydym yn wynebu nid yn unig ddigwyddiadau peryglus, ond hefyd cam-drin. Rydym eisiau i’r cyhoedd ddeall ein bod yn gweithio i’w hamddiffyn, ac rydym yn ceisio addysgu pobl am atal. Rydym yn trin pobl â pharch, a hoffem ofyn am gael ein trin yn yr un modd.
Dengys ystadegau bod dros 18% o gyfanswm nifer yr ymosodiadau ar griwiau yn 2024 wedi’u cofnodi yn y cyfnod hwn yn unig, gyda nifer y digwyddiadau’n dyblu o 2023 i 2024. Mae diffoddwyr tân wedi adrodd am gam-drin geiriol, bygythiadau corfforol, a chael eu hymosod wrth ymateb i ddigwyddiadau.
Yn ystod cyfnod Ymgyrch Bang 2024, gwelodd gorsafoedd Caerdydd, Caerffili, Aberbargod, a Dyffryn gynnydd sylweddol mewn cynnau tân yn fwriadol; gyda thanau cynwysyddion sbwriel a cherbydau ffordd yn cynyddu’n sylweddol.
Mae’r Gwasanaeth yn ceisio:
- Lleihau nifer yr achosion o danau a gynnau’n fwriadol
- Codi ymwybyddiaeth o risgiau tân yn gysylltiedig â choelcerthi, tân gwyllt ac ymddygiad gwrthgymdeithasol
- Annog dathliadau diogel a pharchus
- Dangos yr heriau gwirioneddol y mae criwiau tân yn eu hwynebu gan ddefnyddio data cyfredol
- Atgyfnerthu nad yw ymosodiadau ar ddiffoddwyr tân yn dderbyniol.
Mae Gwasanaeth Tân ac Achub De Cymru yn galw ar drigolion i gefnogi eu criwiau tân lleol a helpu sicrhau bod Calan Gaeaf a Noson Tân Gwyllt yn parhau i fod yn ddiogel ac yn bleserus i bawb. Bydd hyn yn bosib drwy ddathlu’n ddiogel a mynychu dathliadau a reolir gan y gymuned lle bo modd, adrodd ymddygiad gwrthgymdeithasol trwy’r sianeli priodol, a pharchu ein cymunedau, ein hamgylchedd a’n hymatebwyr brys.
