Mae’r stori hon hefyd ar gael yn Saesneg – cliciwch yma i’w darllen.
Mae staff y cwmni teithio a hamdden TUI wedi cynnal digwyddiad agor swyddogol yn eu swyddfeydd newydd yng nghanol dinas Abertawe.
Maen nhw ymhlith y tenantiaid yng nghynllun 71/72 Ffordd y Brenin ar safle hen glwb nos Oceana.
Mae wyth deg y cant o’r swyddfeydd yn y datblygiad bellach wedi’i osod a disgwylir cyhoeddiadau pellach am denantiaid dros yr wythnosau nesaf.
Mae’r tenantiaid eraill sydd wedi’u cadarnhau hyd yn hyn yn cynnwys IWG a’r cwmni ariannol Futures First.
Bydd lle i 600 o weithwyr yng nghynllun 71/72 Ffordd y Brenin a ddatblygwyd gan Gyngor Abertawe ac a ariannwyd yn rhannol gan Fargen Ddinesig Bae Abertawe.
Roedd y Cynghorydd Rob Stewart, Arweinydd Cyngor Abertawe, yn bresennol yn nigwyddiad agoriadol swyddogol TUI.
Meddai, “Mae’n wych gweld cwmni TUI yn y datblygiad newydd, yn ymuno â staff o Futures First yn y cynllun.
“Mae cynlluniau fel hyn yn bwysig gan eu bod yn helpu i gadw busnesau a swyddi yn Abertawe, gan hefyd greu swyddi a chyfleoedd newydd i bobl leol.
“Mae preswylwyr yn aml yn gofyn pam nad yw mwy o siopau yn agor yng nghanol y ddinas, ond y realiti yw, o ystyried heriau fel siopa ar-lein, mae angen llawer mwy o bobl yng nghanol y ddinas i gyrraedd y lefelau o ymwelwyr a gwariant y bydd eu hangen ar siopau er mwyn iddynt ystyried agor yma.
“Bydd cynllun 71/72 Ffordd y Brenin, ar y cyd ag eraill, yn helpu i gyrraedd y nifer hwnnw o ymwelwyr wrth i raglen adfywio gwerth dros £1bn barhau i drawsnewid ein dinas.”
Mae’r cynllun 104,000 troedfedd sgwâr yn cynnwys teras gwyrdd ar y to sydd â golygfeydd dros Fae Abertawe, ynghyd â phaneli solar ar ben yr adeilad a systemau adfer gwres i leihau’r defnydd o ynni.
Mae cyswllt newydd rhwng Ffordd y Brenin a Stryd Rhydychen hefyd yn rhan o’r cynllun.
