Mae parc antur newydd sbon sy’n cynnwys nodweddion dringo ymysg brigau’r coed yn agor yfory yn lleoliad poblogaidd Parc Gwledig Gnoll, Castell-nedd.
Wedi’i ariannu gan Lywodraeth y DU, mae Tyrau Gnoll yn faes chwarae antur aml-lefel sy’n cynnig ystod o nodweddion hygyrch ar gyfer ymwelwyr o bob oedran a gallu, gan gynnwys llithrenni, waliau dringo, rampiau ac ardaloedd aml-lwyfan heriol.
Ddydd Sadwrn, 25 Hydref, 2025, mae’r atyniad newydd, sy’n cynnwys tŵr dringo enfawr Gnoll, yn cael ei agor i’r cyhoedd.
Mae’r parc antur yn rhan o brosiect adfywio llawer mwy, sy’n werth miliynau o bunnoedd, ar gyfer parc hanesyddol Gnoll, a ariennir gan Lywodraeth y DU, sydd hefyd yn cynnwys:
- Canolfan ymwelwyr newydd, hollol hygyrch, gyda chaffi ac ardal chwarae meddal i blant.
- Adfer nodweddion hynafol fel adfeilion Tŷ Gnoll a rhaeadrau deniadol y parc.
- Llety wedi’i uwchraddio i ymwelwyr ym Mwthyn y Pwll.
Lleolir Parc Gwledig Gnoll ar draws 240 erw ac mae’n cynnwys coedwigoedd, ardaloedd agored, a sawl pwll dŵr. Ymysg atyniadau eraill mae llwybrau drwy’r coed, adfeilion hanesyddol, a sawl digwyddiad yn cael eu cynnal drwy gydol y flwyddyn.
Dywedodd y Cynghorydd Hunt, Arweinydd Cyngor Castell-nedd Port Talbot: “Mae’r ardal chwarae gynhwysol hon yn cynnwys tyrau sydd wedi’u cysylltu â’i gilydd, ble gall plant ddringo, llithro, cropian, a darganfod eu ffordd drwy fyd o chwarae dychmygus a gweithgar.
“O lwyfannau isel, hygyrch, i dyrau uchel, anturus, gall plant ddewis eu lefel her eu hunain – sy’n berffaith ar gyfer chwarae aml-allu. Mae nodweddion sy’n denu’r synhwyrau, gemau ar sail lliw, elfennau cerddorol a pharthau tawel oll yn cefnogi ystod eang o anghenion cymdeithasol a chorfforol. Bydd hyn yn ychwanegu at y llu atyniadau a geir yn ein Parc Gwledig Gnoll hanesyddol.”
Ychwanegodd y Cynghorydd Phillips, Aelod Cabinet dros Natur, Twristiaeth a Llesiant: “Rydyn ni wrth ein bodd o allu agor Parc Antur Tyrau Gnoll sy’n cynnwys, wrth gwrs, y tŵr enfawr trawiadol na ellir mo’i osgoi.”
Pan fyddwch chi’n ymweld â Pharc Gwledig Gnoll, peidiwch â cholli’r gosodiad ‘Gnollywood’ a’r llwybr hudol ‘Coeden a Sawl Wyneb’ sydd ill dau ar agor ac yn aros i’w darganfod.
Ariannwyd y prosiect hwn gan Lywodraeth y DU.
