Mae’r stori hon hefyd ar gael yn Saesneg – cliciwch yma i’w darllen.
Cafodd arwyr chwaraeon lleol eu cydnabod yn nigwyddiad Gwobrau Chwaraeon Caerffili 2025, a gafodd ei gynnal yn Bryn Meadows ddydd Gwener 7 Tachwedd. Daeth y dathliad blynyddol â chlybiau, gwirfoddolwyr ac arweinwyr cymunedol ynghyd i anrhydeddu’r rhai sy’n gwneud cyfraniad eithriadol i chwaraeon ar lawr gwlad ledled y Fwrdeistref Sirol.
Roedd y digwyddiad, wedi’i gynnal gan Chwaraeon Caerffili, yn dathlu unigolion a sefydliadau y mae eu hymroddiad a’u hangerdd yn parhau i gryfhau chwaraeon cymunedol ac ysbrydoli cyfranogi ar bob lefel.
Dyma enillwyr eleni:
- Gwirfoddolwr Ifanc y Flwyddyn – Sefydliad Aaron Ramsey: Ioan Walters (Clwb Pêl-droed Wattsville)
- Gwirfoddolwr y Flwyddyn – Cymdeithas Chwaraeon Cymru: Lee Couzens (Clwb Tennis Caerffili)
- Hyfforddwr Cynhwysol y Flwyddyn – Cwpan Coffa Phylyp Butler: Julie Proctor (Clwb Trampolîn Caerphilly Dragonflies)
- Hyfforddwr Cymunedol y Flwyddyn – Clwb Rygbi’r Dreigiau: Michaela Pine (Clwb Pêl-rwyd Iau Caerffili)
- Clwb y Flwyddyn – Langstone Safety and Workwear: Clwb Hoci Sue Noake
- Cyflawniad Oes i Chwaraeon – Cyngor Bwrdeistref Sirol Caerffili: Alison Dacey (Clwb Pêl-rwyd Ystrad Mynach) a Karen Williams (Clwb Pêl-rwyd Iau Caerffili)
Hefyd, cafodd yr arwr rygbi, Steve Fenwick, ei ychwanegu at Wal Enwogion Chwaraeon Tîm Caerffili, gan gydnabod ei gyfraniad eithriadol i rygbi Cymru a’i lwyddiant fel cyn-chwaraewr rhyngwladol Llewod Prydain ac Iwerddon, a Chymru. Mae ei gyflawniadau’n parhau i ysbrydoli chwaraewyr a chefnogwyr ledled y Fwrdeistref Sirol.
Dywedodd y Cynghorydd Chris Morgan, Aelod Cabinet dros Hamdden, “Mae’r gwobrau hyn yn tynnu sylw at y bobl a’r clybiau anhygoel sy’n gwneud ein cymunedau’n gryfach trwy chwaraeon. Mae eu hymroddiad, eu harweinyddiaeth a’u hangerdd yn sicrhau bod cyfleoedd i fod yn egnïol ar gael i bawb ledled Caerffili.”
Roedd y noson hefyd yn cynnwys anerchiad ysbrydoledig gan y Farwnes Tanni Grey-Thompson, un o Baralympiaid mwyaf llwyddiannus Prydain ac eiriolwr blaenllaw dros gynhwysiant a chydraddoldeb ym myd chwaraeon.
Mae’r gwobrau’n rhan o’r ymrwymiad parhaus i hyrwyddo gweithgarwch corfforol a lles drwy Strategaeth Chwaraeon a Hamdden Egnïol 2019–2029, sy’n cefnogi cyfranogiad a chynhwysiant ledled y Fwrdeistref Sirol.
